كافي عاد ؟!

موضوع: كافي عاد ؟! الجمعة نوفمبر 06, 2009 1:29 pm

كافي عاد ؟!

كتابات - ام جعفر

طول عمري واني محترمة نفسي وكاضه الكاع وساده بابي عليه وعلى جهالي ، واكولن السياسة للرياجيل والنسوان لازم تكعد بالبيوت ويربن الجهال ومن اشوف فلانه وعلانه من جماعة العبي السوده اكول يااااااااااه هذني شجاهن ، ومن اشوف ذني الي حاطات طن مكياج ومخليات رجل على رجل و يتفلسفن ويصفطن حجي بروس اليتامى اكول شكد ما يستحن لو كاعدات ببيوتهن ومربيات جهالهن اشرف واحسن ، لكن اليوم اعذروني وره التفجير الاخير مال زارة العدل ومحافظة بغداد توصلت لشي مهم بصريح العبارة اكولها وبلا تردد انه ماكو رياجيل من ابو جعفر (نور عيني ) وشيل ايدك ، تريدون الصدك لو ابن عمه ،الرياجيل الي ما تكدر تحمي وطنها ما تستاهل لقب رجل وخلي يكولون عليه الناس ام جعفر تخبلت لو اتسودنت ، يعني بس تعرفون تصفطون علينه شعارات من صدام الى المالكي وعود و وعود و وعود واحنه نكول سمعا وطاعه وبالنهاية تطلع بروسنا ، صدام ظل يهدد بامريكا الا ان جتي امريكا وطيحت حظه وحظنه وخلتنه طشار كل عشرة بديرة ، وعلاوي ظل ينطنط ويحجي بالمثاليات الا ان سلم الكرسي ملبلب للجعفري ومن استلم السيد دخيل جده دخنه عبالك بالع راديو ما يعرف غير التصفيط والخطابات عبالك (ام نوري العداده ) يريد جنازة ويشبع بيها لطم ، وبعدين حجيه الزايد وصلنه لحلك المالكي الي غركنه وياه ببحر من الدم والالم ، من يوم استلم ابو محبس ولحد اليوم عشرين مرض صار بيه واني الي ما جنت اكول اااااخ يا راسي ، وداعت جعفر (نور عيني) الليل ما انامه من ظهري ، تسكطت ، انكسر ظهري من شيل دبات الغاز وصرت انام مثل الفطيسة حتى ابو جعفر وره سنتين من حكم المالكي كام يصبغ شعر ويدور مره صغيره ، والله مصيبة ، اني بالله عليكم من يروح رجلي من ايدي اتربح بالمالكي وحكومته اللكف ، لا تكولوي ولا اكللكم ، المالكي سواها بلا ملح لزك بالكرسي عبالك كرسي الخلفوه ولا هو كدها بالعراقي ولا كدها بالهندي، ومع ذلك يكابر على حساب ابني وابنج وابنك ، اني مريه مالي علاقة بالسياسه والي يسوي خير لجهالي اخلي فوك راسي واهتف اله بالروح بالدم نفديك ياهو الجان، بس شوفونه فعل لا اظلون تتبجبجون مثل النسوان ، عمي انطوني الرئاسة وشوف شلون اظبطها مثل ما ظبطت ابو جعفر الي جان بشبابه يوميه بحضن وحده وهسه راسه ما يشيله من الكاع ، لو ما يجي المالكي ويخليني حايره بالنفط ولاالغاز والحصة التموينية وشتم نفسه شويه ، بالمناسبة ابو جعفر (الله يحفظه ) من اشد المعجبين بحكم المالكي يكول بعهده كثرت التفجيرات وبلكي يوم تروحين بواحده منها وارتاح منج ، هو يحبني بس يتشاقه وهذا شقة الرجل العراقي كله الله ياخذج واحبج يولي وموت الكرفج خوب انتم مو غربه اشو كتابات ما يدخلها بس العراقيين ، الزبدة والكيمر والجبن مال الحجي هو ، اذا السياسيين العراقيين ما يتعلمون البساطة بالحكم ما تمشي السفينة ولا ربع متر ، كل السياسيين لا استثناء ما يعرفون يقودون البلد ، همه شبيهم السنه اشو اني من السماوة وابو جعفر (صدقه لعينه )من ديالى وصارلنه 15 سنه متزوجين ومخلفين 11 طفل وهو سني واني شيعية والرجل باصملي بالعشرة على منصب رئيسة وزراء البيت مدى الحياة واني حتى منصب وزير بلا حقيبة ما انطيته وهو لا يحيص ولا يفيص ، كفيلكم العباس ابو راس الحار القيادة بالتفاهم وبالفن مو بالعنتريات واحدكم على نفسه ما مأمن ويتهدد هنا وهناك ، طبعا انتم حافظين الاسطوانه مالت الدباغ والمالكي راح يكول التفجيرات الاخيرة وراهه البعثية والقاعده ، زين هلمره راح نصدكم واصلي الفجر وادعي على ابو الثلج وعلى اسامة بن لادن ، بس ممكن سؤال ابو اسراء ؟ صدقه للمحروسة اسراء ، انت شنو شغلك صارلك اربع سنين ما كدرت تقضي على فلول البعث وكم مجرم من القاعده ، شبيك مو كلت اني واني وراح اخبطها واشرب صافيها ، مو انته الي هوسو جماعتك من فزت احنه الخططنه الملعب والحنه لنلعب بيه ، تاليه لا انت نجحت بالتخطيط ولا شفناك بالملعب لان المدرب مكعدك احتياط ، اخواني واخواتي اني تعبت فعلا من هلوضعيه اشو كضيت عمري معلمة تاريخ وابو جعفوري (صدقه لعمره) معلم رياضة ورواتبنه اثنينه ما يكفن لنص الشهر ومكضيها جمعيات ما ظلت شغله شريفة ما اشتغلتها ، روبة روبت ، خياطة خيطت ، خبز خبزت للناس ،حتى اربي جهالي اوصلهم لعتبة الامان لكن هو وينه الامان صار حلم ، بالله عليكم كومة سياسيين مشوربين واحدهم ياكل بيه السبع شهر ما يكدرون يصفوها بس صدك مثل ما كال رجلي ابو جعفر (فدوه العينه) همه ما يريدوها تصفه لان من اظل الامور هوسه يصير البوك سهل ، يابه والله بلشه وياهم يعني ماكو زلمة اخو خيته ويصفيها ، الله اكبر اروح ادور زلم من دول الجوار ، هم تكولون ام جعفر تخبلت ودور زلم من بره والوطن مليان ، بصراحة راح تخلونه نترحم على ايام صدام اي هاي هي الحقيقة ، لانه على الاقل جان مسويلنه امان حتى لو سوه جم مقبره جماعية لان انتو سويتو نفس الشي بعد انتم بيش اختلفتو عنه ، اني من اليوم ما راح اسكت ، وراح اظل اطالب وادردم الى ان يكون عدنه زلم ، ويجي واحد اخو خيته ويظبط الامور ، وما اطول عليكم السالفة يمكن ماكو فايده وراح اتحزم بعباتي وانزل للميدان السياسي لان الامهات همه لازم يديرون البلد علمود سلامة اطفالهم

26/اكتوبر/2009

* معلمة متقاعدة / خبرتها في السياسة كخبرتها في تخصيب اليورانيوم

Dr.Akeil Alfaraj.